Lahat ba ng namamagang kulani ay dahil sa kanser?

 Ano ang KULANI at kailan ito dapat i-BIOPSY?

Ang mga KULANI ("LYMPH NODE" sa English, "LUSAY" sa Bisaya) ay normal na matatagpuan sa maraming parte ng ating katawan. Ito ay ang bahagi ng ating immune system kung saan naninirahan ang mga lymphocyte na panlaban sa mga infection at iba pang mga sakit tulad ng lupus at cancer. Karamihan sa ating lymph nodes ay hindi nakakapa dahil malalim o nasa loob ng katawan ang mga ito, pero maaaring makakapa ng paisa-isang kulani sa leeg, kili-kili at singit kung saan ito ay parang butil ng mais sa ilalim ng balat. Ang pamamaga ng kulani ay pinakamadalas na dulot ng mga bacterial/viral/parasitic infection, ngunit sa ilang pagkakataon ay maaari itong maging senyales ng cancer. Hindi dahil may kulani ka ay mayroon ka na agad cancer.

Kailan dapat ipa-biopsy ang isang kulani? Kapag mas maraming check sa mga ito, mas lalong dapat ipatingin sa doktor para sa posibleng biopsy.

1) Kapag ito ay patuloy na lumalaki

2) Kapag ito ay tumagal nang higit 4 weeks

3) Kapag walang ibang mga senyales ng kaakibat na infection tulad ng ubo, sirang ngipin o pigsa

4) Kapag hindi ito lumiliit kahit nakatapos na ng dalawang ulit ng tamang gamutan para sa isang pinagsususpetsahang infection

5) Kapag may kasamang iba pang abnormal na sintomas tulad ng madalas na lagnat, pagpapawis sa gabi at pangangayayat (hindi sinadyang pagbawas ng higit 10% ng karaniwang timbang sa loob ng nakaraang 6 months)

6) Kapag nagdidikit-dikit na ito sa isang grupo at hindi naigagalaw kapag hinahawakan

7) Kapag nagsugat, dumugo o pumutok ito

Walang "pangtunaw" sa mga kulani. Para magamot ang mga kulani, ang sanhi nito ay kailangan munang matukoy para iyon ang gagamutin. Kaya mahalagang magpatingin agad sa doktor kapag ikaw ay mayroong kahina-hinalang kulani para ikaw ay masuri, magawan ng mga nararapat na laboratory test at magamot ito nang tama depende sa diagnosis.